著衫係一種態度

宅女再培訓 by C+﹝轉載﹞
引用自：http://laucecilia.blogspot.com/2009/02/blog-post_20.html

週六，Girls Night Out。艾雲娜問張大小姐
「要做一個靚女，係咪一刻都唔可以鬆懈，要時時都Keep住靚？」

曾經我好疑惑，點解張大小姐落街放狗，著件背心，加條綿質運動褲，都咁索咁正，但我著上身就成個阿嬸？自己先天條件不足，由九歲識佢個日已經知道。但，無理由爭九十九條街咁遠架。

之後寄居係佢屋企一段時間，慢慢我觀察到，就算落街放狗，佢都要起碼搞廿分鐘先出得門口。到底搞咩呢？

佢紮條馬尾，唔係我亂咁伶橡筋紮住就當係。係用梳好仔細咁紮，我以為不經意既零亂，原來係有技巧地營造出黎。呢Part，用左6分鐘。佢著個件背心同條綿質運動褲，買個刻已經有揀Cutting／質地，出街前仲會襯一襯，有時又撞下顏色，令個Look望落有Sharp醒既感覺。呢Part 又用左8分鐘。跟住佢會花三分鐘企係鏡前面。檢查下個樣同Look，再順手戴埋適合既耳環／手鍊／頸鍊。最後三分鐘，用黎著鞋/綁狗/伶報紙鎖匙。

個時我諗，嘩，煩到咁。唔好搞我！但因為實在等得太耐了(Weekend 去玩阿大小姐起碼要九十分鐘先出得門口囉唔該)，咁我橫事坐係到呆等，咪學佢搞下呢搞下路當消磨時間。搞搞下，發現同一件衫，襯唔同妝／髮型，可以Dress Up / Dress down，有唔同感覺，換句話說，可以買少左野。又，當有朋友仔突然間講句「咦你呢排靚左喎。」，「你今日咁著幾好睇。」，口可能答係咩係咩？但個心，開心到飛起。

以前覺得You are what your wear 絕對係一句Marketing Slogan！衫之嘛，不過係一張花紙唶，駛唔駛講得咁嚴重？

但而家我開始成為信眾！尤其當我發現，張花紙吸引，唔單止會更加顯眼突出，亦會加強他人好奇心，令佢地更想知道花紙入邊包住乜野。（I am talking about the soul / brain, not the body u dirty freaks）

係，開頭真係覺得好煩，但慢慢習慣後，其實又係一種紀律，對自己既一種要求。Wyman曾經寫過一篇〈喂，你點揀衫o架？〉，我好同意下面呢幾句：
「－ 要穿得好襯得靚，首要條件是要知啲嘢喺邊度搵返嚟，正如煮席好菜關乎於最美味的食材自那兒找，這點修煉不能懶。

－ ….(佢)出手就係襯得咁靚，本能嚟嘅，修養嚟嘅，唔通專登襯得肉酸啲？冇人見到嘥唔嘥？一啲都唔嘥，當係襯衫練習最好，平時喺河北省金川鎮體育館，喺冇觀眾情況下也揸正嚟做練練練，他日參加奧林匹克上鳥巢才不會在幾千萬人面前失手啊！

－ 要着衫襯衫所謂進步，必須由你未試過的東西組合開始，即係你以為「唔着得出街」的衫。」

又，做咩講著衫？聽日開估！
-----------------------------------------------

喂，你點揀衫o架？by 黃偉文﹝轉載﹞
引用自：http://wyman.etowns.net/weblog/?p=3251
蘋果日報 2008-10-26

我不是以襯衫襯得叻馳名的，但我應承過自己，如果儲夠1,000個人問我「你平時點樣揀衫襯衫o架？」那麼就證明了我襯衫的方法就算不是真的很有參考價值，至少也是很多人希望從我身上八些東西，8貨中8客，當是正面教材反面教材都好，如果這麼多人問，講出來大概總有點用吧。

未必一句講得晒，但趁我記得，有幾多寫低幾多，逐點逐點，縱未完整，好歹是張地圖，盡量替大家省點寃枉路。

今天先來兩段小故事三個重點。1.韓國泡麪的啓示

我又身陷奇怪的處境了。今次我在超級市場的調味品櫃前，面對幾百枝不同牌子的豉油，呆立，並非因為自己初入廚分不清「生抽」、「老抽」、「草菰老抽」、「御品醬油」、「頭抽」、「壽司豉油」、「蒸魚豉油」與「無鉛老抽」……我，來到這裏，靜靜話你知，是因為間諜活動。

剛才在「絹豆腐」的水缸前唔覺意偷聽到中女姊妹的對話，自己雙腳就不受控制，忍不住吊住佢哋尾，只因戴眼鏡那位語氣較似家姐的講了句：「……我陣間介紹隻韓國即食麪過你嘆吓吖，嘩，嗰隻嘢，我次次開完OT返屋企，見到佢就開心，煲煲滾水等佢三分鐘，啖湯甜到呢真係冇人有，完全唔似即食麪，嘩，如果再『瀋』一執芝蔴或者黑椒落去呢，我就真係魂魄都唔齊囉。……」世間上如果真有這樣好味的即食麪，都不枉我扮冇嘢跟足全程，陪這對其實唔認識的中女姊妹遊花園遊足十分鐘，卒之蕩到去即食麪的貨架了，終點在望。

但企正陌生人隔籬偷睇人買乜嘢似乎太猖狂，於是我提早轉入早一排的調味品架，偷聽這個被人哋家姐形容得咁神奇的韓國即食麪，到底是那一款，這一招偷聽，大概可以叫「隔油買麪」吧。

「呢呢呢，咪呢隻囉！」

我要等她們散去，才可回尋寶地點。

但當兩姊妹聲音漸遠時，我來到即食麪專櫃，才知大劑，嘩，原來呢間supermarket賣的即食麪，單計韓國出產的，都有60款，究竟那一款才是中女姊妹口中的「魂魄唔齊」呢？為了這個麪我跟蹤到呢度才跟甩，係咪有啲唔抵？

追！惟今之計，只有追回那兩姊妹，看看她們的手推車上放的是那個款式的即食麪。

我推着自己的手推車，論論盡盡地繞場一周，最後在收銀處前大隊才找得回那泡麪姊妹花，但係，頂，啱啱就係職員幫她們將最後一件物品放入環保袋，收錢找錢的一秒，我搞了半天為了得到一個好味的麪餅，最後只得個桔。

所以，從此，當我想要一樣嘢，我一定會不恥下問，即使是在街上截停陌生人冒着被當成儍佬的可能，也在所不惜。

而且，更早便更八卦更眼利，入到時裝店，先看人家在試甚麼買了甚麼，入到人哋屋企，總要求參觀衣櫃……

要穿得好襯得靚，首要條件是要知啲嘢喺邊度搵返嚟，正如煮席好菜關乎於最美味的食材自那兒找，這點修煉不能懶。

2.錦衣夜行記

家人夜半兩點七換衫出街，我睇一睇，咦咦？N. Hollywood灰色針織長袖衫，Dsquared2卡其Chinos roll埋腳，再加對Gucci啡色鱷魚皮loafers？嘩，我問咁夜着得咁靚去邊？佢話，冇，漏咗份嘢喺office十分鐘之內即去即返。咁使唔使咁靚？咁一出手就係襯得咁靚，本能嚟嘅，修養嚟嘅，唔通專登襯得肉酸啲？冇人見到嘥唔嘥？一啲都唔嘥，當係襯衫練習最好，平時喺河北省金川鎮體育館，喺冇觀眾情況下也揸正嚟做練練練，他日參加奧林匹克上鳥巢才不會在幾千萬人面前失手啊！啊，有道理有道理！所以今日開始在家裏穿了T恤運動褲我都襯一襯先得。

本周貼士：
不要因為「着咗唔出得街」而唔試某一些衫，對，有些衫你一看就會問「點搭地鐵呀？」「着去邊呀？」，但回心一諗，不是這樣的怪衫，即是「着去邊都得的衫」，你還有那一個款那一個色未擁有未着過，這些衫你已經日日着而且不干預的話會着到百年歸老，你甘心忿氣嗎……要着衫襯衫所謂進步，必須由你未試過的東西組合開始，即係你以為「唔着得出街」的衫，如果需要練大自己個膽，由萬聖節開始吧。夠膽扮喪屍木乃伊出街，遲啲你會夠膽着Rick Owens和Balenciaga了。Happy Halloween！