謎一樣的牆

按：起牆的累，撞牆的也累，兩人的相處難道是求苦的？
---------------------------------------
有啲女仔就係鍾意起座城牆嚟保護自己 by 田小姐﹝轉載﹞

引用自：http://www.vjmedia.com.hk/articles/2015/05/16/106858

最近朋友A突然燥底：「都唔知依家啲女仔究竟諗緊咩？」阿A好少會問啲咁嘅問題，佢個樣唔差，身高17X，又識得搞笑，所以都有好多女仔鍾意佢。跟住佢同我講，原來佢最近追緊個女仔，但個女仔對佢忽冷忽熱，好地地傾偈可以傾好耐，不過當阿A表示對佢有好感，佢就即刻縮沙，搞到阿A唔知點好。我即刻擔心佢係咪入左伍都唔知，但A就話個女仔唔係會收兵嘅人。

「我其實鍾意佢嗰陣佢已經有男朋友，不過佢半年前分左手。聽講係個男仔搵左第二個。」

哦！原來係想乘虛而入。

佢笑笑口咁話：「有位唔通唔入咩。」跟住佢又嘆氣：「但佢好似唔鍾意我。」

我學佢咁嘆左一口氣，然後拍一拍佢膊頭話：「佢唔係唔鍾意你，佢係唔敢鍾意你暏。」

有啲女仔，天生鍾意築牆嚟保護自己。佢地多數對愛情好認真，所以未揾到一個啱嘅人之前，佢地係唔會將自己嘅城牆拆落嚟。如果想追佢，你大約要花多幾倍嘅精神同時間，因為佢會不斷考慮，不斷測試你究竟係咪一個適合佢嘅人。如果你花唔起時間嘅話，我勸你都係另謀高就，不過如果你咁有決心想同佢一齊，請你一定要肯定自己係一個可以保護到佢、令佢可以一世幸福嘅人，如果你做唔到，你就唔好害人啦。你咁樣唔單止害左個女仔，仲害埋人地嘅真命天子。追佢地係好難，不過正因為難度高，你所得到嘅回報就越高，因為呢種女仔一但選定你，佢就會用盡心力去愛你。大約朋友A所講嘅女仔就係呢種人。呢個女仔曾用盡畢生心力去愛一個男仔，但點知個男仔竟然搵左第二個，好似你起樓咁，你第一次起完唔隱陣冧左，第二次再起梗係加多啲鋼根水泥起穩啲啦。個女仔為左第一個男仔拆左座城牆，冧左之後，佢唯有再起一座更高嘅城牆去保護自己。

其實無論男女都係，拍過一次拖，衰左，有啲人會愛一個上一課，變得越嚟越好，有啲人會自暴自棄，變得越嚟越濫，有啲人更會怕左拍拖，寧願單身。不過無論係邊一種人都好，都應該擁有被愛嘅權利。

「咁我應該點做先可以令佢相信我？」阿A好苦惱咁問。

「無㗎啦。精誠所至，金石為開。」然後我用「有陰謀」嘅眼神望住佢話：「不過我覺得你都係check清楚你係咪俾人收左兵都唔知先啦！」

佢「哈哈」咁乾笑左兩聲，然後繼續低頭whatsapp佢女神。

--------------------------------------

鍾意起座城牆嚟保護自己啲女仔，可能只得賤男嚟拆牆 by 十里夫﹝轉載﹞

引用自：http://eros.vjmedia.com.hk/articles/2015/05/21/92449

風流才子Anson最近又甩拖，去年回哲學系讀MPhil的他三個月前不知如何成功媾到一位名為Diana的理學院final year女生，看Facebook照片是文靜內向型，早幾日status正式轉回single。

「追完正式拍拖兩個幾月，追嗰陣仲開心過拍嗰陣，搞唔掂，無謂煩。」Anson一如以往不介意向我們解釋分手原因，此時其賤男、情場騙子之名大概已在Diana的朋友圈子間廣傳，我們則只暗自慨歎阿寶又要出動。

據了解，Diana再對上一個男朋友已是中七時分手的同班同學，上大學後拒絕了數位理學院狗公的追求，結果卻在final year下學期被Anson用個多月時間攻陷，正當預備認真開展這一段戀情時Anson卻提出分手，以致在家哭了整整數天，而Anson則說已經特意等她考完試才分手，盡量減低影響。

「你條仆街根本係追到手後就覺得冇晒刺激感所以即刻話分手，知唔知咁樣可以好hurt架？」好友Kenny似乎這次也看不過眼，加入聲討行列。小弟則忽然想起近日看過一篇題為《有啲女仔就係鍾意起座城牆嚟保護自己》的文章，覺得頗為適用，於是也share出來炒花生。

不過Anson似乎對這類供讀者投射自己以建構自我身份認同的感情類文章特別嗤之以鼻，少有地認真回應說：「咪霎戇啦！又要真命天子又要老奉等人追，仲話要起城牆保護自己嚟等人拆？你自我物化成一幢牆在先，一味被動冇互動，咁咪得返拆嗰下有刺激感，拆完咪就再冇價值囉！你當正自己係牆咁比人拆嘅話，咁咪只能夠睇邊個拆牆技術高，怨乜春冇真命天子比人hurt啫。」

「個問題係你知自己係玩家，人哋仲係情場初哥，當初就咪搞人啦！人哋真係分分鐘以後比你搞到有陰影架！」

「咁一來嗰陣真係有feel，二來我從來冇隱暪過我啲情史，你情我願，佢要揀我呢條仆街係informed choice嚟架喎。放心啦，佢呢啲咁唔知自己想點同要乜嘅女人，就算冇真命天子，衰極到三十幾歲咪又係會受唔住社會家庭壓力是但走去搵個人結婚生仔，終會搵到件嘅，大把人係咁啦。」

「＿！所以咪話你正一仆街。」深明Anson性格的Kenny，雖然覺得其說法十分刻薄，但似乎亦無法提出有力反駁，最後沒他好氣，隨便將話題換掉作罷。

小弟其實是覺得Anson應多一點體諒其他人在感情問題上未必能像他一般理性和有經驗，但對那種只是一味等人追卻又要怨沒好男人追的女性，亦是不敢恭維。沒甚麼是理所當然的，包括真命天子的存在，要麼改變自己，要麼改變他人，不然就一起去改變，否則——其實也沒甚麼否則，有感情沒愛情地跟錯的人就這麼一世，結婚生仔，比比皆是，還是活得下去，死不了的。在未肯作出改變這一點上，Anson和Diana，其實都是一樣。（當然，小弟這種死毒男，毒足廿幾年，其實也沒資格說人甚麼。）

「某程度上根本係Diana自己final year驚畢業都出唔到pool，兼誤判以為自己係可以靠認真付出去改變Anson嘅人，先會明知佢個底咁花都仲要受媾啫，係可悲，但間唔中總係會有呢啲人，冇計。」這是當日嘗試聲討時早已知道真相的Kenny事後說的，Anson倒從未提及此原委，到底算不算是他以自己的方式對前女友所給的最後保護，反正事不關己，小弟無意深究。