香港愛的故事

見到而家啲女仔，我好慶幸自己有當年搵到個好老婆﹝轉載﹞

引用自：http://www.discuss.com.hk/viewthread.php?tid=22951508&extra=&page=1

富貴的聰明懶人 2014-2-13 01:02 AM

岩岩見到有個post話我地d男人唔好咁，睇內容，又係港女一名。我就好慶幸自己搵到個好老婆。

當年我同老婆在大學開始拍拖，畢業後就各自搵工作，佢做大公司，我做小公司，好唔好彩，來了個沙士，我工作的小公司倒閉，我成為失業漢，當時好努力搵工都搵唔到，坐食山崩，戶口只剩二千幾蚊，經常要女朋友接濟...

當時我乜野都冇，我決定做冇人會做既野：求婚。我用戶口裡剩低二千幾蚊買左隻粒石細過塵既戒指就同佢求婚，我話比佢知，我而家乜野都冇，只有佢，所以好自己想佢永遠留係我身邊，而佢，冇介意我當時乜都冇，就應承左我（而家諗返，佢係咪傻架？），當時我問老豆老母借錢，再加埋佢儲既錢，就擺酒結婚，當時沙士，酒店四千蚊一圍。人情五百，一圍賺二千，補返婚紗錢同蜜月錢，就只係蝕左禮金比外母。

婚後我努力工作，識人多左，後來自己攪生意，香港經濟又轉好，今時今日，我每月賺十幾廿萬，但每月我搵幾多我都比哂老婆，因為，佢當年冇嫌我乜都冇，佢應得。

有時我臨訓時會問老婆，點解當年佢會揀我，佢話，因為我對佢好～

其實，我心諗，佢對我仲好啦！

睇返而家D港女，成日話男朋友搵唔到錢，唔想同佢捱，老實，你唔同過個男人渡甘苦，個男人係唔會珍惜你。

有幾多男人廿來歲就有車有錢又有樓？好男人就好似好紅酒，要釀三十年先會有味道，你太早飲，會又苦又澀，可惜女人只會諗自己青春有限，永遠唔明呢個道理。

算罷啦港女，去搵你地自己心目中有錢仔啦，然後又比人玩完食完再分手，重複呢個動作兩三次，之後再發現自己已經廿八九，三張黎緊時先來怕嫁唔出，然後話自己要求高，又話單身活得精彩啦～

當然，香港仲有好多好女仔，兄弟們，共勉之！

-----------------------------------
湖南姑爺 2014-2-13 05:40 PM

幾時都話，愛情呢家嘢，就好似打乒乓波咁，你一板嚟我一板去，咁先過癮，下下開殺球鬼同你玩咩？樓主跟當年嘅女友玩滴滴仔，發展到今時舉案齊眉，實在可喜可賀！

-----------------------------------
波神憂比 2014-2-13 09:05 PM 

支持    因為我老婆同樓主老婆一樣，無因為我果時咩都無，現在唔係話好有錢，但我有個好老婆我開心，問佢做咩果時還同我一起，佢就答同你一起時開心囉，傻佬，

-----------------------------------
modoho 2014-2-13 09:18 PM

都有另外ge，人夾人。
有個同老公捱了大半世既老婆，之後家富了，但老公包二奶，雖然沒有離婚，但老公搬出去了，最後係點就唔知，浪子回頭金不換。離離合合都係情。

樓主要互相扶持到老啊！

-----------------------------------
Gogogo129 2014-2-13 09:58 PM

我係一個30歲嘅女人，24識我第一個男朋友，佢個陣搵唔多，仲欠銀行債，好難頂。
我同佢一齊一年之後佢先肯搵過第二份穩定嘅工。
我就算唔係同佢住，只係住星期六日都會分擔水電，我地每日放工都會煮埋飯佢食，因為怕出街食好貴，一齊第三年，比我發現佢有第二個！仲同我講，觀察緊邊個對個好！

原來個個女人借左十萬比佢還債。

咁我呢三年都比唔上一個錢字！

我想佢有骨氣，我肯同佢一齊捱，但係佢原來為錢，願意幫人拎手袋。

我地第四年離離合合過好多次，直到某日我發現自己冇積蓄。。。先識走。


到而家分開左咁耐，佢都搵我，不過一諗起呢啲咁急功近利嘅人就怕左。

唔係唔想同你捱，有時係你自己貪心月冇能耐。男女都一樣。

-----------------------------------
y_cch 2014-2-13 10:16 PM

其實我對男朋友好好，好就佢，好冇脾氣，亦會比埋佢果份錢，但點解佢唔珍惜？其實真係人人唔同，男人未定性都唔會好似你咁珍惜你老婆

-----------------------------------
sam0099 2014-2-13 10:23 PM

好男人就好似好紅酒，要釀三十年先會有味道，你太早飲，會又苦又澀，可惜女人只會諗自己青春有限，永遠唔明呢個道理。

-----------------------------------
瘋瘋癲癲os 2014-2-13 10:57 PM

但有d人只可共患難，一朝富貴就變

-----------------------------------
富貴的聰明懶人 2014-2-13 11:06 PM

當年係唔想佢同我捱，但又覺佢將女人最好幾年比左我（18-25），如果冇結果會好負佢，所以決定比名份佢，如果佢願意就留，唔願意就唔想嘥佢時間結婚後同我家人住，到有細路先搬走而當一個人窮到乜都冇，就自然明白錢其實唔係咁重要，呢種感覺好難解釋，但就係當你有錢唔重要呢個概念時，你就搵到錢。

應該講，其實要生存，只要千來二千蚊一個月（唔計住），只係物慾先會令一個人搵萬幾都唔夠駛，道理就好似以前搵六千一個月，就會話人有萬五一個月好好駛，但當自己搵萬五一個月，就硬係唔夠駛，覺得如果有三萬一個月會好好駛，但當搵三萬一個月時，一樣唔夠駛，但有冇人諗點解？

當你冇錢，冇物慾，乜都冇，就會茅塞頓開，之後就明白錢係乜野一回事....

-----------------------------------
好波盡在奧脫福 2014-2-13 11:13 PM

多謝
順帶一題 我原本拍拖前都有五十萬積蓄 而且每個月累積中
一拍拖樣樣出雙份 旅行買名牌
最後被人逼婚 咁就一世玩完
而家錢被某人洗曬中成日嫌我窮話後悔
話早知道搵個醫生商人老公就唔駛做野享福
坦白講你老公我仲後悔 真係想死x左投胎好過

-----------------------------------
tomorrow88 2014-2-13 06:06 PM

有幾多男人似你富貴後不嫌棄糟糠妻你睇XXX紅左咪飛左同佢捱左咁多年GE女友仲立即娶左另一個女人因為對男人而言，佢有錢左，level 唔同左當然會要個靚D後生D LA所以有D 女人會現實D要男人而家 ...

-----------------------------------
foreverwithyou 2014-2-13 11:25 PM

哈哈. 我都睇到個POST，留咗幾隻字表達對D用看似道理嘅歪理去包裝自己貪婪性格嘅人嘅不滿。

我都好好運，搵到一個顧家，唔貪圖物質生活嘅好老婆。佢比我早做野。喺我讀書時期，無私地分享佢辛苦所賺嘅錢。有時候要現金透支都冇埋怨。而家我雖然唔係好似樓主咁富貴，但係我地都有屬於我地嘅居所，私家車同車位。我都同樓主一樣，扣除供養父母嘅費用後，全數比老婆。因為我好相信佢唔係注重物質生活嘅人，值得我將一切奉獻比佢。我並唔係想曬命，只係想警惕D無知嘅人。唔種善因，係唔會得善果。不斷貪心追求，所得的只會比應得的更少。

我老婆都想攪生意，本由我出。我都想佢成功，等我可以早D退休，名正言順食-軟-飯！

最後恭喜樓主搵到好老婆同祝各brothers搵到可以同甘共苦嘅伴侶。

-----------------------------------
KEIKO_YEE819 2014-2-14 12:43 AM

當年，我男朋友咩都無我陪佢捱，到佢咩都有既時候，我男朋友同我分手，決定媾過個，你女朋友好彩囉，個男人無嫌棄佢，但你都會諗：佢係咪傻，

咁都跟你？只能夠講，女人只係保障自己，佢地無錯的

-----------------------------------
pigletkei 2014-2-14 12:44 AM

樓主，其實我當年情況同你差唔多，都係畢業遇上沙士俾人炒左...
只不過我女朋友嫌我搵唔到工無志氣飛左我，依家諗返其實都係一件好事...
最少我經歷過咩都無的日子，做人最緊要沉得住氣，明天會更好

-----------------------------------
笑。 2014-2-14 01:28 AM

咁你老婆都幸福，但唔系個個好似你老婆咁好彩，嫁到個好男人，有d一有錢就搞女人啦！

-----------------------------------
jobian 2014-2-14 02:32 AM

其實未必個個男人都好似樓主你咁識感恩，而且我覺得你肯用自己成副身家去買求婚戒指俾老婆，即係証明佢喺你心目中幾咁重要！
我個case同你都有d似，我同老公結婚時佢又係失緊業，不過佢冇好似你咁用曬全副身家買戒指向我求婚，只係有日喺屋企摺摺下衫佢突然同我講:不如結婚囉！我以為佢玩叫佢咪玩啦！之後佢話唔結就算咁佢算唔算求婚
結婚戒指佢其實都唔想買，不過我覺得佢好似玩咁好唔認真所以話佢，之後佢用左五千蚊買左對戒指。我地只同家人食飯，擺左三圍，每圍三千幾，連禮金兩萬幾，加埋其他雜項大概四萬左右都係佢老豆出，其實我阿爸有話過我係大女，唔擺酒請親戚好寒酸，但我老公冇錢，佢屋企亦唔富貴又冇乜親戚唔想大搞，所以我老豆都好唔高興。我阿媽話只要我老公對我好擺唔擺酒有乜所謂？！
我同佢冇影結婚相，冇渡蜜月，結婚時租衫買禮服俾佢，花仔花女禮服嘅錢都係我出，我冇問佢拎返，因為佢覺得要搞咁多野已經好煩，所以我都廢事因呢d事同佢嘈。
轉眼結婚已三年幾，不過嗌交多過乜，佢亦嘈過n次離婚，亦喺嗌交時話過其實佢未遇到一個佢好愛嘅女人，覺得我愛佢比佢愛我多！佢亦試過同我媽及妹嗌交，叫我媽食屎，我媽話我跟住佢冇幸福的。
我阿婆亦好心痛我結婚後好似仲唔開心過以前，又要捱，老公又對我只屬一般，好似委屈左我咁。
到宜家我仍然同我老公一齊，我自問付出的比佢多，佢屋企人亦覺得佢娶到我係佢福氣，覺得個仔欠我太多了，所以老爺奶奶對我都不薄。
不過到宜家我老公都冇覺得娶到我有幾幸福，三年幾了佢人工如舊，每月都係一萬左右，冇樓主你咁勁！佢做工都係冇份做得長，成日覺得自己懷才不遇，他朝一日會發達。
其實我冇諗過如果真係有一日佢發左達會點，因為佢有錢係佢嘅事，肯同我分甘同味當然好，如果要棄糟康出去搵第二個都冇辦法！其實我只希望有朝一日佢會好似樓主咁，記得有我呢個女人喺佢生命中出現及為佢付出過，懂得感恩我已心滿意中了。
所以我覺得樓主覺得幸運遇到好老婆時，你太太同樣亦要感恩有個咁愛佢嘅老公
祝你地中西情人節快樂，永遠幸福，恩恩愛愛。

-----------------------------------
purplebubbles 2014-2-14 03:16 AM

太多太多既實例，d男人可以共患難，但不願同老婆共富貴，就算無丟下老婆，都成日出去玩女人，要個老婆傷心，個老婆徐左啞忍，無野可以做到。
港佬們，徐左成日話女人唔肯同你地挨，更應該問下甘多男人之前點對女人，點解令到女人無信心羅個心對你地。

-----------------------------------
alilau 2014-2-14 03:18 AM

其實就算只係去party同人吹水，初次見面我都唔會主動問人做邊行，更莫講話問人幾錢人工（匪夷所思）。

啱傾就傾多兩句，話不投機就算數。喺邊度做嘢、做咩行業，同呢個人啱唔啱傾根本無關。

自己身邊啲朋友，幾熟我都只不過係大概知道佢哋做咩職業，知道埋喺邊間公司做真係冇幾個。

係唔係而家香港人揾男友係咁明碼實價？唔覺得好核突嘅咩？定係我老土？

-----------------------------------
ahelen 2014-2-14 03:23 AM

好多女人都可以共患難，相反無幾多男人可共富貴。

-----------------------------------
Awesomename 2014-2-14 03:44 AM

其實唔好只話而家啲女仔，而家啲男仔比起以前啲男仔都自私好多，可能而家好多獨生子女，比父母縱壞晒。

-----------------------------------
Gary0315 2014-2-14 03:48 AM

確實時代唔同左，依家啲人價值觀好怪，港女係有問題，但她們依然大把狗跟，男人夠醒的話絕對唔會比女昆，因為係未港女好快你就知，係港女的話點都收唔埋，昆你亦有數圍，思想溝通唔來，咪肉體溝通下囉

-----------------------------------
akasa_venlila 2014-2-14 03:53 AM

樓主講得好，同我既經歷差唔多，都係冇錢娶老婆，不過就冇同屋企借錢，因為反晒面，只係註冊冇擺酒，老婆同我捱左幾年，我依家都係搵既錢比晒

老婆，依家有車有樓咩都唔決，全部寫佢名，但娶佢果陣真係窮到租樓交租都要拖幾日，都係之後發奮一步一步做生意先有今日！

-----------------------------------
ahelen 2014-2-14 03:55 AM 

今日係呢度，看到各位講男女可否共患難既話題，本人突然間好心酸，因諗起同男友我同佢共左四五年既患難，為左佢我放棄我原本擁有既野，原本我咩都唔使做，認識佢之後，我要出來做野要離開家人，要租屋要要搵錢養詎，重要替佢還卡數，呢幾年係我人過得最苦日子，男人真係唔可以對佢太好否則苦果個會係自己。

-----------------------------------
ahelen 2014-2-14 04:16 AM

我為左佢，同自己相識十幾年既朋友絕交，亦放棄左我家，我當初只係中於自己既感覺我愛佢所以咩都願意付出，只想得到佢既肯定，可惜我付出既佢從來唔覺得係付出。

-----------------------------------
JayJayFool 2014-2-14 05:00 AM

師姐，我之前個女朋友既經歷都好慘，直頭玩到大埋肚同個有$仔走左，但我而家無怨過佢，始終大家一齊既時候係有快樂過，我放低哂，同而家個女朋友已經有計劃打算，與其問點解點解，不如重新出發啦我好信一樣野，有d人同你搭同一程巴士，但中途會落車架，就算你父母都唔可能陪你一世啦，佢
地都有落車(百年歸老)既一日，係咪？繼續比心機搭埋程車，留意下有咩人上車好過啦，加油

-----------------------------------
ahelen 2014-2-14 05:22 AM

我D朋友以錢行先，識男友一定係要佢有錢，我過去一值好反感唔認同佢地行為，同埋佢從來唔會使錢係男友身上只會要男友使錢係佢地身上，當初我好反感佢地行為。佢話我知話女人使錢係男人身上既話男人只認為你低賤更加得唔到男人既心。我一直都唔認同架，依家我認同啦。

-----------------------------------
okamandy 2014-2-14 06:37 AM

非常支持樓主，祝你幸福快樂！
我係女，本身小康之家，老公身世比較坎坷，我都從來冇嫌佢窮，就算到我地結婚，都係自己兩個夾份簡簡單單註冊就算，連酒都冇擺，不知不覺大家都結左婚4年！
依家D港女成日都要為結婚嘈餐飽，有錢咪豪擺冇錢咪將就囉，所以D港女嫁唔出都要自我檢討下先！

-----------------------------------
BrownieRabz 2014-2-14 07:03 AM

我都捱咗咁多年損手癱腳不知幾多次先搵到個可以大家一齊同甘共苦嘅人。其實愛很簡單，只係有時自己（未必係人地）太復習令到個原本發展突然扭轉。真係要睇大家點應對

-----------------------------------
tengteng25 2014-2-14 08:13 AM

晒x氣~仲之而家大部分既男同女對愛既睇法都同以前好唔同，香港女仔當然思想有問題，男既只要一付出就想得到肉體上既回報，什麽中出即飛平時都聽唔少，而家d人對愛既觀念只重點放係性上？如果雙方思想都唔改永遠只係一個惡性循環

-----------------------------------
好波盡在奧脫福 2014-2-14 08:44 AM

唔係個個女人識諗，樓主話隔離個post，到而家仲有幾個港女好似顛雞咁係咁鬧意見不合的人(已經唔係反駁因為完全無point)，自我中心，只求得到不求付出就係呢代部分最差的年青人。
男人唔勤力唔自我提升係廢物。
但女人唔付出，一心只想老公養唔需要返工但也唔想做家務，平日唔識稍微節儉但過時過節要金銀珠寶。旅行另一半出曬，卻只顧篇排滿曬自己購物的行程。食最好住更好卻要另一半存到錢為以後更好的生活。自己無付出卻要所有權力自己大曬。可能嗎？

-----------------------------------
ryo0829 2014-2-14 09:30 AM

只因為佢心態未仆直，
每個人心中仆直既定義都唔同
我唔排除有D廢人連一毫都冇四圍R都唔會知個羞字點寫
你個個炒股男，賺得易仆得快，但係咁快主動幫左佢，我懷疑佢分分鐘FEEL唔到你幫過佢。

仆街之後會唔會醒你幫對眼就知

-----------------------------------
kf1980 2014-2-14 11:37 AM

ching，我覺得樓主講得好O岩喎，無錢唔緊要，錢可以賺，人有三衰六旺，今日有錢聽日可以破產。其實男女可以好簡單，我對你好，你對我好，你對我不離不棄，我就跟你禍福相依。但依家香港的確有好多女仔口就話睇人品，但係行為就Ｏ岩Ｏ岩相返，好彩既吊到個金龜，然後享十年福，到人老珠黃，個老公因為你個樣已經唔掂，性格又唔好，最後離婚收場，例子多的是。唔好既仲慘，就好似樓主所講，比人玩完一次又一次（其實你唔送上去比人玩，人地點會玩到你呢？），最後嫁唔出，之後話單身活得精彩（無意中傷女士的，如果自己覺得唔係既女士，可以不理）。

我覺得咁，有經歷既感情先可以長久，靠物質支撐既感情，大難臨頭各自飛自飛或是比人玩完即棄已是常識吧？

P.S. 男仔呢要大度，包女朋友老婆洗費，只要自己經濟許可我覺得係無問題的，但如果個女仔完全唔睇你能力，Ｄ樣想要果樣想買，咁你真係自己唸過，問題唔係個女仔用幾多錢，而係個女仔根本無體諒男仔既心。。。

女仔如果講男女平等，我好支持，但唔好口講一套，做又一套，追要男仔追，錢要男仔出，氹要男仔氹，跟住就話平等？？ＤＤ似乎叫輸打嬴要....BTW，樓主共喜你~你有一個好老婆，記住有錢唔好滾呀，否則你老婆肯定傷心死，幾多錢都補唔返~，願你地天長地久~

-----------------------------------
ungwaikin 2014-2-14 11:37 AM

家人本來就要互相扶持，我都係爲人父母，錢又帶唔落棺材，個仔係咁嘅環境去求婚，女方又應承，肯定係愛情唔係建築係金錢上，做父母嘅呢個時候可以做嘅就係盡量幫忙，而且係"絕對"相信個仔有能力有責任日後維持整個家庭的任何事情，包括經濟及感情上，依家嘅港女開口又錢埋口又錢，其實
錢用以衡量關係真係好弱智，樓主嘅幸福及幸運真係藉得現今年輕一代(不論男女) 去感受一下，如果人與人之間傾斜係金錢上，最終都只會以金錢理由結束~~~

-----------------------------------
ccm427 2014-2-14 11:38 AM

噤看你老婆的確好好~
但你問心如果你有個女，你想唔想自己個女嫁俾個當時噤的環境的男人？

人係有三衰六旺無錯。但"貧賤夫妻百事哀" 你應該都有聽過。將來的事無人知。只能靠你現在的環境去推算將來的事。機會大d.女人係要搵個依靠呀。

當然依靠有好多方面。個男的人品，處事，經濟各方面都好重要。你們一味話人港女。

其實你們又有無企係女生的立場諗過呢？

-----------------------------------
Awesomename 2014-2-14 01:13 PM

其實樓主老婆都應該唔係傻嘅，佢都應該睇得出你係有上進心先嫁你啫，唔通又窮又懶都嫁咩。而且你呀媽借到錢比你結婚酒店擺酒，證明你屋企一啲都唔叫窮，起碼你老婆都唔洗貼錢嫁你。
呢度啲港男其實都好無知，成日話港女只講錢，要知道現代成功嘅男人（唔係講樓主上一代白手興家呢種）揾女友都有要求，又要有份好工，又要樣靚身材好。 
我自問有份好工，樣ok，自己經濟ok，我男友當初咪又係會考慮我呢啲條件。唔通揾個好窮嘅女友攪到自己生活多咗負擔咩。
呢個世界男女都唔同咗，成日話人港女啲男人都應該醒一醒，係咪你冇上進心冇能力冇學歷？見到樓主揾到好老婆，慨嘆而家啲女仔點差嘅同時都反醒吓點解你哋冇樓主咁成功。 
唔好淨係識得講「這些機會不是屬於我的」

-----------------------------------
alanwinning 2014-2-14 01:21 PM

樓主真有自信，
若我易地而處，莫講結婚，
應否繼續拍拖都成問題，費事累人。

而事實上，遇到一個肯同你「捱」既女仔，
會驚，驚自己比唔到幸福佢，你反而會離開佢，
認為自己唔適合拍拖，唔配有個咁好既女朋友。

當你略有所成，有少少條件，
認為自己係時候拍拖，想搵個女朋友，
又會覺得佢地都係因為你既條件先同你一齊。

人有時就係咁矛盾

-----------------------------------
babyshan 2014-2-14 01:51 PM 

我係90後..都自認港女..中意名牌(日本)，中意買野..但唔會要求人地買比我..從來係自已搵自己買..而家自己無家庭負擔咪買多d..但唔會去到credit card 只還min. pay..
我眼見我身邊d女同事，朋友..都唔係港女...有d會肯為自己男友還賭債，都會同自己男友同甘共苦..有d女仔自己屋企本身有錢，會肯同男友，男友屋企人蝸居..雖然佢初初都唔慣(係自己屋企十指不沾陽春水，去到男友屋企一齊share 家務)..但之後都無野..一家人相處得好開心..
我覺唔係個個都港女..係要睇個女仔有幾愛你..
我自己覺得個男仔唔洗搵好多，最緊要錫自己，對自己好..唔洗好叻..因為自己都唔係叻..同佢食粥食飯都咁開心既男仔 
至於上進心呢d野..好虛無，最緊要上進過我就得..因為我已經好懶，好唔上進..日日只求準時放工...兩個都咁懶..老左要食風...

-----------------------------------
Vicky;P 2014-2-14 03:25 PM

好2睇，我覺得仲會有你太太E D咁好ge女仔，只係又有幾多男人會珍惜~
唔少男人都想搵個靚女友/老婆，所以先會拎有D女仔要求好多~
最重要都係大家啱唔啱~

-----------------------------------
ccheung717 2014-2-14 04:48 PM

我嫁我老公時都係咩嘢都無，但我地都無問人借，原因係唔想比人睇死，同埋欠人人情，加上我都無父母，佢老豆又死咗，以前有諗過環境好d就擺酒，不過d錢揾得咁辛苦，即使擺三萬蚊一圍，都會有人講是非架啦，點解要貼錢買氣受喎，風唔風光自己知，唔駛做比人睇，過到自己就得，但無樓主老婆咁有福，老公依然唔係揾好多，夠食夠住都ok la！

-----------------------------------
marco820 2014-2-14 04:49 PM

樓主，真的很羨慕你 (出自真心的)
個人認為，個人際遇真的很重要
特別是時機一到，自己要好好抓緊。
這些事，都是人生經歷下的體驗，只有自己才箇中明白。
坦白說，一個鍾情於自己的女生，是不會希望另一半亂花錢
用物質去逗她高興，享樂之類。
因為大家長遠有考慮將來，有計劃行事。
在此，祝願樓主情人節快樂。

-----------------------------------
Yuki127 2014-2-14 05:15 PM

我自己覺得女仔想搵個有錢又叻嘅男朋友無可口非，但呢個條件唔喺最主要的條件！
因為如果但自己喺佢心目中唔喺最重要的話，佢再有錢再叻都無意思！
我之前有個男朋友master畢業喺IB做，但佢為人自我又計較，咩都以自己為先，同佢嗰段時間真喺好辛苦
而家呢個男朋友雖然喺個普通accountant唔有錢，但所有野都以我為先，對我好過對佢自己！我同佢一齊的每一日都真喺好開心，真正感受到被愛的感覺

奉勸各位姊妹睇人唔好被d表面野蒙蔽，試試用心去感受對方點對自己
如果有一個男仔，有1億但只肯在你身上花1000蚊，另一個男仔，有100蚊但卻肯在你身上花100蚊
我想你應該會明白點揀

-----------------------------------
富貴的聰明懶人 2014-2-15 12:12 AM 

女人想知個男人跟唔跟得過，好簡單，睇佢同老母關係係點就得，好仔一定錫老母，錫老母第日多數錫老婆，萬試萬靈！

-----------------------------------
tko_investor 2014-2-15 01:15 AM

雖然冇法証明係唔係作古仔，不過講既的確係事實！

女人揀有錢男人嫁，9成個男人心底裡唔會真正珍惜條女。無論條女幾索個男人心底裡都會覺得佢係貪錢。唔係真心。唔會感激佢。只會當佢係同林鳥。
到將來玩厭左飛左條女就自然合情合理，問心無愧！(好多女明星都要面對離婚就係咁) 

-----------------------------------
imshit 2015-4-12 04:28 PM

只可以講，樓主有一個好老婆，而你老婆亦都有一個好老公，感情係雙向嘅，你點對人，人地點對你。最弊而家個社會，港女多，player多，婚外情多，好似樓主咁嘅情況，少之又少啦！

-----------------------------------
Cursed_Sapphire 2015-8-11 09:56 PM

其實反而想知當時樓主點對太太（當時女友）好而令你太太非你不嫁？
我覺得你未失業前一定對女友好好，未必講話買貴嘢，而係心靈層面上…
會唔會你好溫柔，好有承擔，令人有安全感？
呢樣呢家好多男人都無咗，先令我們香港女仔把安全感 focus 係錢身上…

-----------------------------------