飲嘢 by 方卓如﹝轉載﹞

信報 2014.6.19

我研究咗好耐，平時飲嘢尤其是新相識，你傾偈講什麼話題，會暴露你是什麼人。熟我的朋友都知道，我冇乜嘢講，一大班人飲嘢，我坐低睇報紙，他們都慣晒。但聽埋聽埋，飲嘢講乜嘢，是無可掩飾的露底行為。
 
話題令人「露底」

最常見的話題是講公事，講吓做緊乜嘢，老細點，公司應該點點點。如果飲嘢時候一個女仔講公事，九成九佢係單身冇男朋友。初時只係統計學觀察所得，但久而久之我發現點解。當腦入面首先浮現的話題是公事，證明一定是投入工作，才會本能地想到用公事作話題。放工會一大班人飲嘢，又寄情工作專心投入，梗係冇拖拍，仲使問；反過來，話題只有公事的女子，生活乏味，咁，單身都好自然。

話題是旅行的，呢個人應該是沙塵白霍。廿一世紀，個個都有經驗或多或少出過門，旅行本身並非大件事，而其他人亦對你去過邊度冇興趣。拿這個話題大講特講，是炫耀你有錢有時間，繼而顯示這個人冇自信，要用這類話題掩飾自己的不濟。

用運動作話題，這個人有點意思。現代人唔多運動，有運動已經唔係一個悶蛋（雖然齋跑步可能都是悶蛋一名，但今日不在此深究），仲可以作為話題，至少要對這項運動有點研究，有些心得，才可以形成話題。一年游一次水，邊有嘢同人講？而夠膽用運動作話題，這個人應該唔只玩一種運動，否則兩句講完，或者傾談對象唔玩你提起的運動，你冇得即刻轉台講第二款，隨時dead air，好鬼尷尬。

滑雪唔啱講潛水，潛水唔啱講單車，單車唔啱講帆船，帆船唔啱講網球，講到啱為止，大把嘢講。識玩咁多樣運動，這個人唔好話傾偈，直情要深交下去。
 
談時事要「鬆人」

如果用本地時事做話題，這個人你要即刻放低杯酒，輕輕按一按個肚，說有點兒唔舒服，走先。萬一佢開始講東北發展、白皮書、6.22、地鐵工程、反黑打人、剪布、停車封閘，這個人，一係在外面暴力衝擊入面，一係在入面暴力抹黑外面。在外面的人不會有機會飲嘢，全部被人拉晒去打，這個一定是入面的人。

放工飲杯嘢啫，你有權揀人，你唔想佢出去話代表你，又話你好偉大。讀番書的你，佢又唔肯同你講英文。想輕鬆吓搞到咁辛苦，何苦？