身為港男又學人講男 by AUDI計數佬﹝轉載﹞

按：男人應有的氣魄。你先努力賺錢，才有資格揀女。
---------------------------------------------------------------------------

引用自：http://menwhenmiddle.blogspot.com/2009/03/blog-post_18.html

近排呢個話題又在熱番，尢其是剛做完的「星期日檔案」播出之後，迴響極大，好多扑友如娜姐、馬沙等都有討論，其實呢個只係一個 expectation gap既問題，本來都唔想多討論，但見個個都有講，我又即本發表下意見，學下馬沙咁，身為一個港男去講男。

好讚成陶傑所講，做男人要有自信，要懂同人溝通：自信係要訓練同培養出黎，多d同人溝通，唔好成日在屋企只係上網打機自己同自己玩，閑住自己個人又點會成長？唔係話你要做演講家，但做男人講野時要有points、要到題、要俾人有種說服及肯定既感覺，講野le le lur lur俾人一種細佬仔感覺，如片中電車男，唔好話係一般女仕啦，連我都唔想多聽佢講野。

男人亦要明白一點，男人既自信大多數黎自事業，俗d講即係同金錢掛鉤，呢個係自古以來既定律，唔好將呢個責任推俾女人話佢地見錢開眼。男人要「上進」，因為咁做先有「錢進」，然後先有自信。

老實講，男人靚唔靚仔唔緊要，但絕對唔可以冇自信，而自然地有自信，搵錢既能力都比其他男人高。

我覺得女人要求另一半有相當既經濟基礎絕對唔過份，老實講，作為一個男人，根本唔應該係由個女人去要求，而係你自己本身都應該有咁既心去增加自己既財力，作為一個男人，唔該唔好將所有責任推到別人身上，自己先做好自己先。

當然，無錢唔等於冇女人，不過做男人要有自知之名，既唔靚仔，又冇錢、人格又差絕既，就唔好幻想有美女好女好似天使下凡咁鐘意自己，當然唔靚仔，又冇錢、人格又差絕既唔等於一定冇女人愛，正所謂「大賊都有人愛」，但都係o個句，要有自知之名。自己條件差幻想有美女相伴，發夢啦。

男人絕對唔能夠活在幻想中，當然，唔係叫你唔打機、唔睇動漫畫、唔玩figure公仔，我都好鐘意打機、睇漫畫，不過呢D只係我興趣，唔係我全部，更唔會過份沉迷，唔會將自己活在遊戲、動漫中，做男人點都要現實d好。所以你話如片中電車男經常去的樓上cafe，我就一定唔去，就算去，都係當一個見識，唔會經常去，更加唔會幻想身邊另一半經常叫你主人前主人後，毛骨悚然。

身為一個男仕，唔該自己要面對現實，唔好經常活在幻想世界中、唔好以為你是主人所有女人都是僕人，一來現在唔係古代，二來根本唔需耍。

最後女人要求另一半既條件高左，我又覺得正常過不得了，女人自己爭氣提高自己既條件，要求另一半有番咁上下正常過不得了，換轉我自己係女人，我都會係一樣，so what。

Before去投訴女人之前，做男人既先自己問自己，你有冇盡力成為一個真正既男人先？唔係有支肉棍就叫做男人。

以上可能有好多人反對，我倒冇所謂，至於我好似幫晒D港女，對唔住，唔係喎，某部份香港既女仔係有自事過高，過份地吊高黎賣既問題，其實一樣要罵...

都係嗰句，expectation gap既問題，嚴重地持不同方向。