我的舊老細 by 米都話唔搞咯﹝轉載﹞

引用自：http://ricericemake.blogspot.com/2008/08/blog-post_19.html

以前曾經跟過一個「有趣」既老細。


我呢個舊老細永遠鬧人唔駛本，而且重鬧得泥係好唔尊重人既；即係，咩粗口都出齊，亦會用啲好侮辱性既說話泥鬧，例如：「ｘ你屎忽丫，你讀咁多書讀屎片架，咁都唔識！」、「挑，你個腦生响屎忽度架？咁ｘ蠢都有既？」


如果佢鬧既嘢係合理既都仲算好，幣在佢大部份鬧既嘢都係唔合理既。因為佢既諗法，根本好多時就係唔合邏輯既（一個正常會用邏輯諗嘢既人又點會咁鬧啲下屬？）


而由於佢做嘢唔識得跟邏輯，佢好多時根本唔知大老闆諗緊啲乜，於是每一次準備開會，佢都係「漁翁撒網」咁將所有資料呀，唔同既option呀咁排晒出泥．．．而做呢啲準備工夫既，當然唔係佢，佢只會講一句：「喂，聽日開會呀嗱，你地準備好晒所有嘢呀吓！唔好到時俾大老闆問到口啞啞呀吓！」咁當然，佢唔會講咩係「所有嘢」．．．而實際上，每次開會用到佢要我地準備既所有嘢既機會，就實在真係唔多，大概用到全部嘢既５％到啦。咁於是，為左開會前一晚有得瞓，我同我啲同事就要估晒大老闆最有機會問啲乜，然後就整嗰啲；其他既嘢呢，就求其印一大疊嘢出泥，好似做左好多嘢咁，其實係搏佢唔睇（呢個計劃９９％係會成功既）。

同埋，我呢個老細同「正常」既老細係唔同既：佢要交一份嘢俾你做嗰時，係唔會brief你呢份嘢既背景同埋究竟想你做啲咩，但就好似預左你知道晒應該要做啲咩咁。例如，佢會聽完一個大老闆既電話，之後就叫我入房，然後對我講：「大老闆啱啱打左個電話泥，話聽日就要個report，你快ｘ啲揾埋阿邊個同阿邊個搞掂佢！」要注意，以上括號入面既說話係佢既exact wording，我首先要估佢口中既「阿邊個」同「阿邊個」即係指阿A、阿B定阿C呢？咁估完之後，又要估大老闆其實想要邊份report?最初返工既時候成日估錯，於是又係俾佢鬧；到之後我醒左啲，識得每逢佢講電話，我就豎起隻耳仔偷聽。就咁，其實如果當你有留心聽一個人講電話，其實你係可以有八成估中同佢傾緊電話嗰個人講緊咩嗰喎！再加上，有時大老闆要啲咩，都可以估到八成（例如月尾就梗係想睇吓今個月公司個account balance。）

所以到左後來，我又真係唔駛佢brief我，都估到八成佢想要啲咩。

不過有時佢真係離譜得好過份既．．．有一次，我同個同事趕左幾晚，為左做份report交俾佢；咁到左一朝早，將份report交到佢手之後，過左唔夠五分鐘，佢就叫左我同埋同事一齊入去。佢跟住就鬧（紅色既係佢既說話，綠色係我講既）：

「你呢份report垃圾泥既，入面啲資料都唔update既！」
「冇理由嗰喎，我地明明check過晒呢啲係最新既data泥嗰喎」（我與同事面面相觀，疑惑中）
「你仲要駁咀！明明你地就做嘢唔小心啦，呢啲點會係最新既data?! 你都冇ｘ用既．．．（下刪一百字不斷鬧我既粗口）」

鬧左幾分鐘後．．．

「而家仲唔拿拿聲出去搞番掂份report佢！」
「但係我手頭上既data真係得呢啲係最update架囉喎～」

就响呢個時候，佢施施然咁响佢自己個柜桶入面攞左畳新既data sheet出泥。
「呢啲先係最新架嘛！」
「但係你冇話俾我知有呢啲新既data喎。」
「我冇講，咁你唔識得問架？你做人冇好奇心、求知慾既咩？」

為免再浪費時間，我和同事相視苦笑一下，拿拿聲攞左啲新data就走左出去改份repot喇。

咁，响呢間舊公司度做左一年左右我就走左喇。走既時候，簡直有一種「脫苦海」既感覺。

*******************************************

到而家，過左幾年之後，我反而覺得好感激自己曾經遇上左一個咁樣既老細。

因為响佢手下做嘢，所以我學識左去多觀察，其實唔駛人brief，都已經可以知道應該要做啲咩；

又學識凡事從唔同人既角度諗（例如大老闆想要啲咩，我呢個野蠻老細又想要啲咩），咁就可以將件事做得周全；

仲有，凡事問多兩句，係唔會死人既（例如我而家做report，都會問齊其他人：「呢啲係最新既資料泥既囉呵？」）

更重要既係，學識左獨立．．．以前當我跟住上司做嘢，我都係等上司俾指示，然後去執行就算；到跟左呢位老細，我一定要獨立思考，「究竟佢俾既指示啱唔啱？應唔應該跟住做？唔跟既話又應該用咩方法先可以做到件事？」一定唔可以佢叫我做咩就做咩，咁樣一定會出事。

同埋，最重要既係，當我以後遇到啲咩既激氣事，又或者遇到啲無理取鬧既人既時候，我都可以心平氣和咁去面對，唔會動氣，唔會衝動，唔會傷身；因為我明白左，唔合理既係對方（就好似我上述既「收理data sheet」事件咁），何必同佢一般見識？！只係笑一笑，盡快搞掂件事就係最好既應對方法。

或者有好多人唔駛經過我上述呢啲既「訓練」，都識得晒以上既道理；但係我就真係比較蠢啲，要經過呢個老細「點醒」先識得咁諗．．．